Op 7 april 2025 haet ‘t bestuur van Venloosch Vastelaoves Gezelschap Jocus beslaote um Beejeingeklats de iër te gunne um de Venlose Boerebroélof 2026 te organisere. Ein iërvolle taak!
Mit groët enthousiasme en vuuël ideeje gaon weej aan de slaag met alle veurbereidinge. Uiteraard mit vuuël aandach veur ôs groëte groep blaage die ônderdeil zien van ôs gezelschap!
Zulle weej dan noow maar nao de broélof gaon?
Gaer stelle weej ôs gezelschap mit eur rolle en de indeiling van de kemissies aan ôg veur:
De boerebroélof is ein van de moëiste daag van de Venlose vastelaovend! ‘t Organisaere daovan is op de iërste plaats ein groëte iër, maar daonaeve ouk ein enorme klus en ein groëte verantwoordelikheid! Gelökkig löp det beej Beejeingeklats as vanzelf, mit alle inzet en enthousiasme van ôs leeje. Aevel, einige centrale coördinatie is netuurlik waal gewins. Als besteur zien weej d’r dan ouk veur de algemeine zake. Dink heejbeej aan de coördinatie met Jocus, maar ouk met en tösse ôs eige kemmissies. Ôs verantwoordelikhede zien beejveurbaeld de samestelling van ’t klein- en groët gezelschap en ’t opstelle van ein begruuëting, maar ouk de juridische zake en interne communicatie. Al met al halde weej ein uigske in ’t zeil en zörge weej d’rveur det alles veurspoedig verlöp en idderein ein joeksig jaor tegemood geit! Det wuurt lache!
Veurzitter:
Margie Strijbos-Jacobs
Coördinerend bestuurslid Pers & Propaganda:
Janine v.d. Putten
Coördinerend bestuurslid Techniek:
Eric Verlegh
Coördinerend bestuurslid Wäord en meziék:
Luuk Smets
Coördinerend bestuurslid Kleier:
Luuk Moens
Coördinerend bestuurslid Pieke en Sponsoring:
Ferry Nelissen
Coördinerend bestuurslid Pieke en Sponsoring:
Jordy v.d. Putten
Kriétstrepe bôkse, toëre, lange rokke met en zonder ruffle, jeskes, gilets, plastrons, bolheud en boerepette!
De kleierkemissie haet de schoëne taak um ôs gezelschap te kleije. Zevetiën van ôs leje weite percies welk stof ’t moëiste is, welke knuip ’t beste beej ôs pekskes passe en wie de draod in de naold môt. Dees leje bedinke van zök wies kap, van haase wies sieraod en van pet wies klompe wie weej d’r oét kômme te zeen, met ôs Ellen veurop!
Aevel, neet idderein wet wie des se mit ’t neijmechien werke mos, daorum schakele weej ôs leef mooders, tantes en kinnisse in. Ouk de fijne begeleiding van Mieke is onmisbaar.. Met 108 verschillende köpkes zulle weej door ôs pekskes ein zien as groep en zulle weej strakkes straole. Tösse ’t prachtige traditionele zwart en kant, knipouge weej met ein bietje kleur nao wao weej vanaaf kômme: de groëte Venlose Optoch.
Veurzitter: Ellen Nelissen-Verbeek
Leeje:
Weej vanoét de Pers & Propaganda kemmissie zörge det de Boerebroélof good tot uuting kump richting ’t volk. Van Social Media t/m ein vlegske wao ôs logo op steit, weej regele det idderein zuut wae Beejeingeklats is en wao weej veur staon. Ouk de eveneminte in aanloup nao de groëte daag op Vastelaovesdinsdaag waere dao ôs georganisaerd. En det alles in ôs eige hoésstiel. Netuurlijk in good euverleg met al ôs andere kemmissies zal idder evenemint d’r spik en span oétzeen en make weej d’r ein fanatasties fees van. Wilt geej gaer op de huëgte waere gehalde van ôs agenda en ôs letste niejs, volg ôs dan op ôs socials en wae wet kômme we mekaar gauw taege!
Veurzitters: Giel Hovens en Robin Hovens
Leeje:
Beej dit fantastisch boerebroélofsgezelschap huurt ein klupke kreatieve leeje die percies weite wie se tradisie, humor en emotie same kins bringe. Maak kinnis mit ôs: Kemissie wäörd en meziék. De kemissie die de boerebroélof van 2026 neet allein luuët klinke, maar ouk luuët laeve. Mit ôs achte schriéve weej alles waat gezag en gezônge wuurt. Van ’t tradisiegetrouwe “Holladiejeeja” wies ’t leefdesverhaol van ôs broédspaar, van ’t veurstelle van alle rolle wies de interviews, van krante-artikele wies de offisjele aktes. Alles in ôs prachtig Venloos dialek.
Maar dao blief ’t neet beej. Weej zörge ouk veur de rippetisie-aovende, ’t zinge van ôs leed en neet onbelangriék, zörge det weej synchroon gaon sjoenkele. Weej kinne neet wachte wies al ôs wäörd tot laeve kômme!
Veurzitter: Nancy Houben
Leeje:
Weej, de sponsorkemissie, zien ein klup enthousiaste, betrokke en goodgebekte “Beejeingeklatsers” mit ein missie: zörge det we genôg finansjele en materiële steun binne haole um van de boerebroélof een onvergaetelike gebeurtenis te make. Of ’t noow geit um beejdrage in Euro’s, ’t regele van materiale, deenste of ludieke acties – weej zien d’r as de kiepe beej! Weej benadere (lokale) ondernemers en bedriéve um ôs boerebroélof te steune. Weej zörge veur ein moëie taegeprestatie, zoëas zichbaarheid tiédens eveneminte, op socials of tiédes andere momente. Weej bouwe relaties op met ôs partners die net as weej halde van de tradisie, plezeer en verbinding. Weej dinke kreatief en zörge det de sponsoring miër is dan allein ein logo op pepeer.
Dankzij ôs partners kinne weej zörge veur meziék, (aan)kleiding en verrassende elemente. Sponsoring mak ’t verschil tösse ein optoch en ein spektakel! Bis dich of kins dich emus dae gaer wilt beejdrage aan ein uniek Venloos evenemint vol vrindschap en cultuur? De sponsorkemissie steit altiéd aope veur ein good gesprek en ein goije tas koffie (of ein pilske). Want allein same make weej van deze broélof iets um noëits te vergaete!
Veurzitter: Tom Meijers
Lid:
Weej zien de Technische Kemmissie en staon mit 10 man klaor veur ‘t nieje seizoen: dit jaor de Boerebroélof! Gruuëts en vol energie gaon we ôs richte op de aankleiding en ‘t opfleure van alles waat ôs vastelaovend nog moëier mak. We trappe ‘t seizoen aaf mit ‘t Boeremoos Paote, wao weej zörge veur moëie aankleiding, entourage en sfeer. Daonao steit de stasiefoto op ’t program, wao weej alles wies in de puntjes verzörge veur ein prachfoto van ‘t ganse gezelschap. Veur ‘t officieel prissentatiemoment gaon weej alles oét de kas trekke, alles veur ‘ne knallende indrök. En natuurlik, hiël belangriek: ‘t versiere van de huifkerre en ‘t regele van die kerre zelf veur de optocht. Dan gaon weej straole! We zeen good op mekaar ingespeuld, mit jaore aan technische ervaring en hebbe der same weer gruwelik vuuël zin in!
Veurzitter: Robin van Rijswijck
Leeje:
De vastelaovend is ôs 56 blaage met de paplaepel ingegaeve. Ein dink is zeker; de joeks greujt daor!
Dit zien ôs leef blaage van Beejeingeklats! Same vorme zeej ôs blaage boerebroélofsgezelschap!
